नेपालगन्ज: नेपालगन्जस्थित लाइफलाइन जनरल हस्पिटलले मिर्गौला पीडित बिरामी र नर्सहरुलाई लक्षित गरेर नि:शुल्क परामर्श तालिम दिने भएको छ । अस्पताल प्रमुख डा.पारश श्रेष्ठका अनुसार खासगरी डायलाइसिस गराइरहेका बिरामीलाई हस्पिटलले आफै बोलाएर उनिहरुलाई नि:शुल्क परामर्श तालिम दिन लागेको हो ।
मिर्गौलाका बिरामीले के कस्ता कुरामा ध्यान दिने देखि खानपिन, निमोनिया र फ्लू भ्याक्सिनका बारेमा विशेषज्ञ चिकित्सकबाट जानकारी गराइने उहाँको भनाइ छ । लामो समय भेरी अस्पतालमा मिर्गौला विभाग प्रमुख भएर सेवा दिनु भएका फिजिसियन डा. श्रेष्ठले यहीँ आउने शनिबार हस्पिटलमा आयोजना गरिएको कार्यक्रममा मिर्गौलाका बिरामीले अपनाउनु पर्ने सावधानी र डाइबिटिज सम्बन्धि दुइवटा प्रस्तुतिकरण रहने जानकारी दिनुभयो ।
`एक हिसावले यो बिरामीको लागि पढाइ नै हो भन्दा पनि हुन्छ मिर्गौलाका बिरामीले लामो आयुको लागि उनिहरु आफैले अपनाउनु पर्ने सजगता, सावधानी, खानपिनका बारेमा पढाइने छ उहाँले स्वास्थ्य पेजसंग भन्नुभयो-`केहि भ्रम र तथ्यहरुलाई हाम्रो पार्टबाट चिर्ने प्रयास हुनेछ ।´
व्यक्तिगतरुपमा चिकित्सकले बिरामीलाई काउन्सिलिङ त गरेकै हुन्छन् तर यसरी सामुहिकरुपमा गर्दा बिरामीको आत्मवल समेत बढ्छ । बिरामीसंगै नर्सलाई समेत तालिम दिन थालिएको छ। उनिहरुलाई बिषयगटसंगै बिरामीमैत्री व्यबहारका बारेमा समेत ज्ञान प्रबाह गरिनेछ ।
पहिचान भएका बिरामीलाई हस्पिटल आफैले बोलाएर यस्तो उपयोगी परामर्श तालिम दिन थालेको सम्भवत नेपालमै पहिलो हुन सक्ने डा.श्रेष्ठको भनाइ छ । नेपालगन्ज र कोहलपुर क्षेत्रका मिर्गौलाको डायलाइसिस गराइरहेका करीब २५/३० जना बिरामी तालिममा सहभागी हुनेछन् ।
पछिल्लो समय मिर्गौलाका बिरामी अस्वाभाविक रुपमा बढ्दै गएका छन् । बालबालिकादेखि युवा पुस्तासमेत मिर्गौला समस्यासंग जुधिरहेका छन् । अस्वस्थ खानपिन र बदलिँदो जीवनशैलीका कारण मिर्गौला समस्या भयावह बन्दै गएको छ ।
लाइफलाइन हस्पिटलले त्यस्ता समस्यासंग जुधिरहेका बिरामीलाई सस्तो, सुलभ र भरपर्दो सेवा दिदै आएको छ ।
