नेपालगन्ज:  नेपालगन्जस्थित भेरी अस्पतालमा एमआरआई मेसिन आइपुगेको छ । तीन बर्षदेखिको पहल, प्रयास सार्थक हुँदै सोमबार अबेर राती एमआरआइ मेसिन भेरी अस्पताल परिसरमा आइपुगेको हो ।

झण्डै २४ करोड हालको मूल्य पर्ने विशिष्ट क्षमताको म्याग्नेटम भिटा सिष्टमको थ्रि टि एमआरआइ मेसिन नेपालगन्ज आइपुगेको जानकारी दिंदै भेरी अस्पतालले त्यसका लागि आवश्यक अन्य सामान समेत आइपुगेको जनाएको छ ।

‘भेरीलाई विशिष्टिकृत गर्दै जाने क्रममा आइपुगेको एमआरआइ मेसिन ठूलो उपलब्धी भएको अस्पतालका प्रमुख मेडिकल सुपरिटेन्डेन्ट डा. बद्री चापागाईले बताउनुभयो ।  आजदेखि यसको इन्स्टलेसन सुरु हुने पनि उहाँको भनाइ छ । त्यसका लागि पूर्वधार तयार गर्न यसअघि नै नयाँ भवनमा इमरजेन्सी व्यवस्थापन गरिसकिएको थियो ।

तीन बर्ष अघि डा. प्रकाश थापा मेडिकल सुपरिटेन्डेन्ट रहँदा भेरीमा सेवाको विशिष्टिकृत प्रयासलाई तिव्रता दिइएको थियो । त्यतिबेलै तत्कालीन मेसु डा. थापा नेतृत्वले एमआरआइका लागि गरेको पहल र प्रयासले सार्थकता पाएको हो ।

सम्भवत नेपालमै यति ठूलो लागतको मेसिन खरिदमा खुल्ला प्रतिस्पर्धाबाट ल्याइएको पहिलो हो । १८ लाख ३९ हजार अमेरिकी डलर मूल्यको एमआरआइ मेसिनका लागि डेढ बर्षअघि खुल्ला टेण्डर मार्फत एलसी गरिएको थियो ।

तर, विभिन्न प्रशासनिक झमेला झेलेको खरिद प्रक्रियाले अन्ततः अस्पतालका पक्षमा निर्णय भएपछि सार्थकता पाएको हो । जर्मनीबाट ल्याइएको एमआरआइ मेसिन जुलाई १७ मा काठमाडौं झारिएको थियो । स्रोत र साधनबाट यसलाई सञ्चालन गरी आम जनताको स्वास्थ्य सेवामा सहज पहुँच उपलब्ध गराउने विश्वास मेसु चापागाईंको छ ।