नेपालगन्ज: बाँकेमा कार र बस ठोक्किदा दुई जनाको मृत्यु भएको छ । दुर्घटनामा मृत्यु हुनेमा एकजना चिकित्सक समेत परेको प्रहरीले जनाएको छ ।
पूर्वपश्चिम राजमार्ग अन्तर्गत बाँकेको राप्ती सोनारी गाउँपालिका–८ मुगुवा खोली नजिकै मंगलबार दिउँसो साढे चार बजे पूर्वतर्फँ जादै गरेको मे १ ख ३३३५ नम्बरको बस र पश्चिमतर्फ जादै गरेको बा १३ च ८२५३ नम्बरको कार आपसमा ठोक्किँदा कारमा सवार दुई जनाको मृत्यु भएको हो ।
मृत्यु हुनेमा रुपन्देहीकी ५३ वर्षकी डा. सञ्जु खाती खड्का र कार चालक गोरखाका अन्दाजी ३४ वर्षका सुवास अधिकारी रहेको प्रहरीले जनाएको छ । डा. खाती सुर्खेत प्रादेशिक अस्पतालका निर्देशक डा डम्बर खड्काकी पत्नी हुनुहुन्छ ।
डा डम्बर अहिले देश बाहिर रहेको बुझिएको छ । दुवै जनाको उपचारको क्रममा कोहलपुर मेडिकल कलेजमा मृत्यु भएको जिल्ला प्रहरी कार्यालय बाँकेमा प्रमुख सन्तोष सिंह राठौरले जानकारी दिनुभयो ।
दुर्घटनामा परी बसमा सवार ६ जना सामान्य घाइते भएका छन् । उनीहरुको कोहलपुरमा उपचार भइरहेको छ । दुर्घटनामा पश्चात बस चालकलाई नियन्त्रणमा लिएको प्रहरीले जनाएको छ ।
