नेपालगन्जः बाँकेका चारवटा पालिकामा आजदेखि भेरोसेलको पहिलो मात्राको खोप लगाईने भएको छ । सरकारले निर्धारण गरेको लक्षित समुहलाई भेरोसेलको पहिलो मात्रा दिन लागिएको हो ।

जिल्लाको नरैनापुर गाउँपालिका, डुडुवा गाउँपालिका, बैजनाथ गाउँपालिका र राप्तीसोनारी गाउँपालिकामा आज र भोलि खोपको पहिलो डोज दिईने स्वास्थ्य कार्यालय बाँकेका खोप अधिकृत भेषराज शर्माले स्वास्थ्य पेजलाई जानकारी दिनुभयो ।

नेपालगन्ज उपमहानगरपालिका, कोहलपुर नगरपालिका, जानकी गाउँपालिका र खजुरा गाउँपालिकामा भने साउन १० गतेदेखि १२ गतेसम्म खोपको पहिलो मात्रा दिईने खोप अधिकृत शर्माले बताउनुभयो। यो अभियानमा ५५ वर्ष र सो माथिका उमेर समूहलाई समेटिएको छ ।

त्यस्तै विश्वविद्यालय, विद्यालयका प्राध्यापक, शिक्षक र कर्मचारीहरु, सार्वजनिक यातायातमा कार्यरत चालक र सहचालकलाई समेत भेरोसेलको पहिलो मात्रा खोप लगाइनेछ ।

सरकारले तोकेका अत्यावश्यक सेवामा संलग्न खोप लगाउन बाँकी सबै नागरिकहरुले पनि खोप लगाउन पाउनेछन् ।

स्वास्थ्य कार्यालय बाँकेले खोप लिन जाँदा ५५ वर्ष माथीका नागरिकले नागरिकता वा उमेर खुल्ने प्रमान पत्र सहित र शिक्षक, कर्मचारीहरुको हकमा संस्थाले जारी गरेको प्रमाण पत्र सहित नजिकको स्वास्थ्य संस्थामा जान भनेको छ ।

सरकारले चिनबाट भेरोसेल खोप आएपछि अहिले लक्षित समुह निर्धारण गरि खोपको पहिलो मात्रा दिईरहेको छ ।