नेपालगन्ज: बाँकेका अस्पतालमा कोरोना भाइरस संक्रमणका कारण थप तीनजना बिरामीको मृत्यु भएको छ ।
संक्रमित बिरामीहरुको उपचार भैरहेको नेपालगन्ज स्थित भेरी अस्पतालमा १ जना, युनाइटेड अस्पतालमा एकजना र नेपालगन्ज मेडिकल कलेज शिक्षण अस्पताल कोहलपुरमा एकजना गरि थप तीनजनाको मृत्यु भएको हो ।
मृत्यु हुनेहरुमा चौकुने गाउँपालिका ४ सुर्खेतका ७० वर्षीय पुरुष, नेपालगन्ज उपमहानगरपालिका ८ का ६७ वर्षीय पुरुष र खप्तडचना ४ बझाङका ६५ वर्षीय पुरुष रहेको जिल्लाका कोरोना फोकलपर्सन तेज ओलीले जानकारी दिनुभयो ।
योसँगै कोरोना भाइरस संक्रमणका कारण बाँकेमा उपचारका लागि जिल्ला बाहिरबाट आएका २९४ जना र जिल्लाकै २९६ जनाले हालसम्म ज्यान गुमाईसकेका छन् ।
संक्रमण तिब्र रुपमा फैलदा अस्तव्यस्त बनेको बाँकेमा अहिले कोभिड संक्रमण दरसँगै मृत्यु दरमा समेत कमि आएको छ ।
