नेपालगन्जः पूर्वमेयर एवम् वरिष्ठ अधिवक्ता विजयकुमार गुप्ता अस्पताल भर्ना भएका छन् ।
सहकारीको रकम अपचलन मुद्दामा अदालतको आदेशपछि पनि न्याय नमिलेपछि दवाव स्वरुप जिल्ला प्रशासन कार्यालय अगाडि आमरण अनसन बसेका गुप्ता अस्वस्थ भएपछि बुधवार राती भेरी अस्पतालमा भर्ना भएका हुन् ।
सुगरको मात्रा एक्कासी घटेपछि उनलाई भेरी अस्पतालको आइसीयूमा भर्ना गरिएको हो । सहकारी पीडितको पक्षमा निःशुल्क रुपमा कानुनी सहायता प्रदान गर्दै आएका वरिष्ठ अधिवक्ता गुप्ता मंगलबारदेखि अनसनमा बसेका हुन् ।
दुई तहको अदालतको आदेशबाट पनि पीडितले न्याय नपाएपछि बाध्य भएर आमरण अनसनमा बस्नु परेको उनले बताउँदै आएका छन् ।
२०७६ सालमा उक्त सहकारीको रकम अपचलन सम्बन्धी मुद्दा बाँके जिल्ला अदालतमा चलेको थियो । त्यसपछि अदालतले २०८० पुस २६ गते सहकारी वित्तीय विकास संस्था लिमिटेडमा करिव ४३ करोड रुपैयाँ अपचलन भएको ठहर गर्यो ।
उक्त मुद्दामा सहकारी संस्थाका तत्कालिन अध्यक्ष, पदाधिकारी तथा कर्मचारीसहित १९ जना प्रतिवादीलाई सजाय दिने अदालतले आदेश गरेको थियो ।
जिल्लाको आदेश चित्त नबुझेको भन्दै प्रतिवादीहरु तुलसीपुर उच्च अदालत समक्ष पुगेका थिए । तुलसीपुर उच्च अदालत नेपालगन्ज इजलासले २०८२ जेठ १४ गते जिल्लाकै आदेशलाई सदर गरेको थियो ।
नेपालगन्जको सदरलाईनमा रहेको सहकारी वित्तीय विकास संस्था लिमिटेडको ४३ करोड बढी रकम अपचलन भएको उक्त मुद्दामा १ हजार ५ सय २६ जना पीडित छन् ।
