नेपालगन्ज: फत्तेवाल आँखा अस्पताल नेपालगन्जप्रति बिरामीहरूको भरोसा पछिल्ला वर्षमा उल्लेख्य रूपमा बढ्दै गएको छ । चालु आर्थिक वर्षको असोजसम्मको तथ्यांक अनुसार २६ हजार २४४ जनाले ओपीडी सेवा लिएका छन् । श्रावणमा १० हजार ३३०, भदौमा ८ हजार ६६५ र असोजमा ७ हजार २४९ जना बिरामीले सेवा लिएका हुन् ।
गत आर्थिक वर्ष २०८१/८२ मा अस्पतालले १ लाख ३७ हजार ७३१ जना बिरामीलाई ओपीडी सेवा प्रदान गरेको थियो भने २०८०/८१ मा यो संख्या १ लाख ३३ हजार ३३३ रहेको थियो ।
शल्यक्रिया सेवामा पनि वृद्धि
चालु आर्थिक वर्षमा असोजसम्म १ हजार ३२६ जनाले शल्यक्रिया सेवा लिएका छन् । अस्पतालका अनुसार श्रावणमा ४००, भदौमा ६०० र असोजमा ३२६ जना बिरामीले सर्जरी सेवा लिएको अस्पतालको तथ्यांकले देखाउँछ । गत आर्थिक वर्ष २०८१/८२ मा ९ हजार ७८८ र २०८०/८१ मा ८ हजार ६१२ जनाले शल्यक्रिया सेवा लिएका थिए ।
नेपाल–भारतका बिरामी बराबर, ५०% भारतीय नागरिक
अस्पतालका चिफ मेडिकल डाईरेक्टर डा.देव राज भारतीका अनुसार सेवा लिने बिरामीमध्ये करिब ५० प्रतिशत भारतबाट आएका छन् । “पहिला भारतबाट आउने बिरामी अझ धेरै हुन्थे तर सीमावर्ती शहरमा अस्पताल खुल्दा केही घट्यो तर संख्या अझै उल्लेख्य छ,” डा. भारती भन्छन् । भारतका बहराइच, गोण्डा, गोरखपुर, लखनऊ, अयोध्या लगायतका शहरका बिरामी नियमित रूपमा उपचारका लागि फत्तेवाल आँखा अस्पताल आउँछन् । यस्तै लुम्बिनी, कर्णाली र सुदूरपश्चिम प्रदेशका विभिन्न जिल्लाबाट पनि बिरामी आउने गरेका छन् ।
फत्तेवाल आँखा अस्पताल
स्थापना देखि अहिलेसम्म लाखौँ बिरामीको उपचार
वि.सं. २०४३ मा स्थापना भएको फत्तेवाल आँखा अस्पतालले आर्थिक वर्ष ०८१/८२ सम्म २९ लाख २९ हजार ५६३ जनालाई ओपीडी सेवा र २ लाख ९१ हजार ५३३ जनालाई शल्यक्रिया सेवा प्रदान गरिसकेको छ । साथै अस्पतालले निःशुल्क आँखा शिविर, आँखा स्वास्थ्य शिक्षा कार्यक्रम र अन्य सामुदायिक सेवाहरू पनि निरन्तर सञ्चालन गर्दै आएको छ । गुणस्तरीय सेवा र भरोसाले फत्तेवाल आँखा अस्पताल प्रदेशदेखि भारतसम्मका बिरामीको प्रमुख रोजाइ बनेको छ ।
अस्पतालको ओपीडी विभाग
