नेपालगन्ज: संविधानको रक्षाको लागि नेपालगन्जमा मौन प्रदर्शन गरिएको छ । `राष्ट्र जोगाऔं- संविधान जोगाऔं´भन्ने प्लेकार्ड सहित नेपाल पत्रकार महासंघ बाँके र नेपाल बार एसोसिएसनको अगुवाई एवम् शान्ति र लोकतन्त्रका लागि पेशागत संगठन (पापड) सहितको आयोजनामा शुक्रबार नेपालगन्जमा मौन प्रदर्शन गरिएको हो ।
केन्द्रीय सर्कुलर अनुसार संविधानको रक्षाका लागि मौन प्रदर्शन गरिएको नेपाल पत्रकार महासंघ बाँकेका अध्यक्ष नवीन गिरीले जानकारी दिए ।
जेनजीको आन्दोलन र त्यसपछिका विकसित घटनाक्रमले ७ दशक लामो जनताको बलिदानबाट प्राप्त उपलब्धि गुम्ने जोखिम बढेको भन्दै पापडले प्राप्त उपलब्धिको रक्षाका लागि मौन प्रदर्शन गरिएको नेपालगन्ज उच्च अदालत बारका अध्यक्ष चित्र बहादुर शाहीले बताए ।
मौन प्रदर्शनमा नेपाल पत्रकार महासंघ लुम्बिनी प्रदेशका अध्यक्ष शुक्रऋषि चौलागाईं, बाँके जिल्ला अदालत बार एसोसिएसनका अध्यक्ष मेहर सिंह खत्री, प्याव्सन बाँकेका अध्यक्ष विकास बज्राचार्य, प्राध्यापक संघका अध्यक्ष राजेन्द्र कुमार श्रेष्ठ, नेपाल शिक्षक महासंघ बाँकेका उपाध्यक्ष शेखर रावत, नेपाल चिकित्सक संघका सदस्य डा. राहुल कुर्मी, वरिष्ठ अधिवक्ता विजय गुप्ता, नेपाल प्रेस युनियन बाँकेका अध्यक्ष प्रियास्मृति ढकाल सहित अधिकारकर्मी, नागरिक समाज, पत्रकार लगायतको उपस्थिति रहेको थियो ।
