प्यूठान: प्यूठानमा एक युवामा शंकास्पद हैजाको संक्रमण भेटिएको छ । जिल्लाको मल्लरानी गाउँपालिका २, भैसामरेका स्थानीय ३३ वर्षीया एक युवामा शंकास्पद हैजा देखिएको हो ।
बुधवार भारतको जलन्धरबाट घर फर्किदै गर्दा बाटोमा स्वास्थ्य समस्या देखिएको उनले बताएका छन्। घरमा पुगेर स्वास्थ्यमा सुधार आउनुको सट्टा समस्या बढ्दै गएपछि बिहीबार राती अस्पताल पुर्याइएको आफन्तले जानकारी दिएका छन् ।
बिरामीको लक्षण हैजासँग लक्षण मिल्दोजुल्दो भएकोले अहिले उनलाई अस्पतालको आइसोलेसनमा राखेर उपचार भैरहेको जिल्ला अस्पतालले जानकारी दिएको छ ।
प्यूठान अस्पताल विजुवारमा उपचारका क्रममा आराडिटि परीक्षणमा एनटिजिन पोजेटिभ देखिएको अस्पतालले जानकारी दिएको छ । अस्पतालका अनुसार अझै जीवाणु पुष्टि भईसकेको छैन ।
जीवाणु पुष्टिको लागि प्रदेश जनस्वास्थ्य प्रयोगशाला बुटवलमा बिरामीको दिशाको नमुना पठाउने तयारी भैरहेको प्रयोगशाला इन्चार्ज संगम कक्षपतिले जानकारी दिए । दुई दिन अगाडि पनि यस्तै बिरामी उपचारको लागि आएकोमा दिशा परीक्षणको लागि पठाइएकोमा अझै रिपोर्ट आइनसकेको उनले बताए ।
वर्षातको समय स्वास्थ्यको ख्याल गर्न समेत अस्पतालले सुझाएको छ । दुषित खानेपानी, बासी सडेगलेको खानेकुरा लगायतका कारण हैजा तथा पखाला लाग्ने भएकोले यस्ता खानेकुरा प्रयोग नगर्न स्वास्थ्यकर्मीले सुझाएका छन् ।
भारतबाट उनी सँगसँगै आएका अन्य ५ जनामा पनि पखाला लाग्ने लक्षण देखिएको बताइएको छ। तर उनीहरु अहिलेसम्म अस्पतालको सम्पर्कमा आइनसकेको अस्पतालले जनाएको छ ।
