कोहलपुर: बैजनाथ गाउँपालिका-४ स्थित डाइनामिक इंगलिस मिडियम स्कुलमा आयोजित नि:शुल्क स्वास्थ्य शिविरमा करिब ७ सय बिरामीले सेवा लिएका छन् ।

नेपालगन्ज भुजईगाउँस्थित केयर सिटी हस्पिटलको आयोजनामा भएको शिविरमा सात सय बढी बिरामीको नि:शुल्क चेकजाँच र करिब १५० बढी बिरामीलाई भिडियो एक्सरे सेवा प्रदान गरिएको अस्पतालले जानकारी दिएको छ । अस्पतालले स्कुलसँगको सहकार्यमा उक्त शिविरको आयोजना गरेको थियो ।

शिविरमा खासगरी बालरोग विशेषज्ञ सेवा र स्त्रीरोग विशेषज्ञ सेवा प्रदान गरिएको थियो । अस्पतालका बालरोग विशेषज्ञ डा.विष्णु कुमार थापा र प्रसूति तथा स्त्रीरोग विशेषज्ञ डा.राजन महतले बिरामीलाई उपचार तथा परामर्श सेवा प्रदान गरेका थिए । बच्चाहरुमा खासगरी टाउँको दुख्ने समस्या, आँखाको पावरको समस्या, पेट दुखाई र ८० प्रतिशत बढीमा कब्जियतको समस्या देखिएको बालरोग विशेषज्ञ डा.थापाले जानकारी दिए ।

स्कुलमा अध्ययनरत विद्यार्थी र उनीहरूका अभिभावकहरु शिविरबाट लाभान्वित भए ।