नेपालगन्जः सर्वोच्च अदालतले स्वास्थ्य सचिव नियुक्तिको विरोधमा डा संगीता कौशल मिश्राले हालेको रिटमा अन्तरिम आदेश जारी नहुने आदेश दिएको छ।
बुधबारको अन्तरिम आदेशका विषयमा भएको बहसपछि न्यायाधीशद्वय डा मनोजकुमार शर्मा र टेकप्रसाद ढुङ्गानाको संयुक्त इजलासले डा संगीताको माग अनुसार आदेश जारी नहुने फैसला गरेको हो। तर मुद्धालाई अग्राधिकार भने दिने निर्णय गरेको छ।
सर्वोच्चको यो आदेशसँगै स्वास्थ्य सचिव नियुक्तिमा सरकारले गरेको निर्णय अनुसार नै काम अगाडि बढ्ने भएको छ। सरकारले फागुन २१ गते स्वास्थ्य सचिवमा डा विकास देवकोटालाई नियुक्त गरेको थियो।
डा मिश्राले सचिवमा आफू नियुक्त नभएपछि चैत १ गते सर्वोच्चमा रिट हालेकी थिइन्। आजको सुनुवाईपछि आएको आदेशले स्वास्थ्य सचिवमा डा देवकोटालाई नियुक्त गर्ने सरकारको निर्णय यथावत राख्ने आदेश दिएको छ।
