प्युठानः प्युठानमा जन्मिँदै ओठ तथा तालु (जिब्रो भन्दामाथि) फाटेका बालबालिकाका लागि निःशुल्क उपचार गरिने भएको छ । जिल्लाका विभिन्न ठाउँमा छनोट शिविर मार्फत भेटिएका बालबालिकाको प्लास्टिक सर्जरी (शल्यक्रिया) गरिने भएको छ ।

बि एन्ड बि अस्पतालको आयोजना, राष्ट्रिय अपाङ्ग सेवा सङ्घ प्युठानको सह–आयोजना तथा सामाजिक विकास डिभिजन कार्यालय प्युठानको समन्वयमा चार वटा पालिकामा छनोट शिविर सम्पन्न भएको जिल्ला प्रतिनिधि जुमान सिंह केसीले बताए।

उक्त छनोट शिविरबाट ओठ तथा तालु फाटेका सात जना बालबालिका छनोट भएका छन । शिविरमा अन्य नौ जनालाई उपचार परार्मश सेवा दिएको केसीले बताउनुभयो ।

शिविरबाट छनोट भएका विरामीलाई काठमाडौँ लगेर निःशुल्क शल्यक्रिया गरिने आयोजकले जनाएको छ । साथै शल्यक्रियाको लागि जाने बिरामी तथा एक जना कुरुवालाई आउने जाने गाडी भाडा सहित खानबस्नको समेत व्यवस्था गरिएको केसीले जानकारी दिए ।

जन्मिँदै ओठ तथा तालु फाटेका बालबालिकाहरू आर्थिक अभावका कारण चेकजाँच, उपचार तथा शल्यक्रिया गर्नबाट बञ्चित हुने गरेकाले बर्सेनि छनोट शिविर सञ्चालन गर्ने गरिएको उनले जानकारी दिए ।