नेपालगन्जः मेडिकल सहायतासहितको २२ सदस्यीय नेपाली सेनाको टोली म्यानमार उडेको छ । नेपाली सेनाको हेलिकप्टरमार्फत् म्यानमार उडेको टोली बंगलादेश भएर म्यानमार जानेछ ।

भूकम्पमा घाइते भएकाहरुको उपचारमा सहयोग गर्न भन्दै नेपाल सरकारले पठाएको सैनिक टोलीमा सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरू छन् । उनीहरुको साथमा सरकारले भूकम्प प्रभावितका लागि औषधि र उपकरणहरु पनि पठाएको छ ।

करिब एक साता म्यानमारमा रहने नेपाली टोली घाइतेहरुको उपचारमा खटिने नेपाली सेनाले जनाएको छ ।

गत शुक्रबार म्यानमारमा गएको ७।७ म्याग्निच्युटको भूकम्पपछि त्यहाँ ठूलो जनधनको क्षति भएको छ। पछिल्लो जानकारी अनुसार दुई हजार ७०० भन्दा धेरैले ज्यान गुमाएका छन्। झण्डै चार हजार घाइते भएका छन् ।

उद्दार टोलीले भूकम्प गएको पाँचौ दिन बुधबार बिहानमात्र एक जना युवाको सकुशल उद्दार गरेको थियो । भूकम्पको पाँचौ दिन हुँदासमेत राहत तथा उद्दारको काम प्रभावकारी हुन नसकेको गुनासो बढ्न थालेको हो ।