नेपालगन्जः सल्यानको दार्मा गाउँपालिकाका विभिन्न वडामा निःशुल्क कान स्वास्थ्य शिविर सुरु भएको छ । दार्मा गाउँपालिका स्वास्थ्य तथा सरसफाई शाखाको आयोजना तथा ब्रिनोज कान स्याहार केन्द्र नेपालगन्जको प्राविधिक सहयोगमा वडा नं.१ को दार्माकोट स्वास्थ्य चौकीमा शिविर भएको हो । शिविरमा १७८ जनाले सेवा लिएको वरिष्ठ कान सहायक चिकित्सक तथा ब्रिनोज कान स्याहार केन्द्रका आउटरिच इन्चार्ज भिषण कुमार थारुले जानकारी दिए ।
थारुसँगै अर्का कान सहायक चिकित्सकले बिरामीहरुको कान चेकजाँच गरेका थिए । यसअघि मंगलवार दार्मा गाउँपालिका वडा नं.५ स्थित ढाकाडाम स्वास्थ्य चौकी र बुधवार वडा नं. ४ स्थित भन्चौर स्वास्थ्य चौकीमा शिविर गरिएको थियो । ढाकाडाममा १६१ र भन्चौरमा १४१ जनाले सेवा लिएका थिए ।
तीन ठाउँमा भएको शिविरमा ४८० जनाको कान चेकजाँच गरिएको आउट रिच इन्चार्ज थारुले बताए । उनका अनुसार सेवा लिनेमा पुरुष भन्दा महिला धेरै थिए । ३०२ जना महिलाले सेवा लिँदा पुरुष भने १७८ जना थिए ।
कान चेकजाँच गरिएकामध्ये ४३ जनालाई शल्यक्रियाका लागि रिफर गरिएको छ । त्यसैगरी ११८ जनामा कान पाक्ने समस्या देखिएको छ । शुक्रबार दार्मा गाउँपालिकाको वडा नं.३ स्थित दार्मा आधारभूत स्वास्थ्य सेवा थुम्केसल्लीमा शिविर आयोजना गरिएको छ ।
