नेपालगन्जः बाँकेको डुडुवा गाँउपालिका ६ मा दुई सय २० जनाको निःशुल्क आँखा जाँच भएको छ । भिजन आँखा अस्पताल नेपालगन्जको आयोजना, किभा फाउन्डेसन र डुडुवा गाँउपालिकाको सहकार्यमा निःशुल्क आँखा जाँच शिविरमा ९० जना पुरुष र एक सय ३० जना महिला गरी जम्मा दुई सय २० जनाको आँखा जाँच गरिएको हो ।
हिरमिनिया स्वास्थ्य चौकीमा सञ्चालन भएको दुई दिने शिविरमा ४७ जनालाई मोतियाबिन्दुको समस्या देखिएको कार्यक्रम संयोजक बिज्रेश मिश्रले जानकारी गराए ।
शिविरमा परिचालित स्वास्थ्यकर्मीका अनुसार सबैभन्दा बढी मोतियाबिन्दुको समस्या देखिएको छ । डुडुवा गाउँपालिकाका विभिन्न स्थानमा १४ गते सम्म शिविर चल्नेछ ।
आँखाको समस्या भएकालाई सम्बन्धित औषधि शिविरमै पाउने र चस्मा पनि सहुलियत मुल्यमा पाउने व्यवस्था गरिएको किभा फाउन्डेसनका उपाध्यक्ष रामदिन मोदीले जानकारी गराए ।
आँखाको अप्रेशन गर्नुपर्ने बिरामीलाई भिजन आँखा अस्पतालले ५० प्रतिशत सम्मको छुट उपलब्ध गराउने छ ।
कात्तिक ४ गते अस्थाई स्वास्थ्य केन्द्र दलैपुर र कात्तिक ५ गते डुडुवा ५ कम्दी स्वास्थ्य केन्द्रमा निःशुल्क आँखा जाँच शिविर सञ्चालन हुने तयारी छ ।
