विरगञ्जः नेशनल मेडिकल कलेजमा एक १९ वर्षीय युवतीको डिम्बासयमा पलाएको सिस्ट दूरबिन प्रविधिबाट शल्यक्रिया गरी सफलतापूर्वक निकालिएको छ । महिनाबारी गडबड भएर जम्मा भएर बनेको रगत र पानी जमेको सिस्ट (इण्डोमेट्रिओमा)लाई दूरबिन प्रविधि (ल्याप्रोस्कोपी) बाट निकालिएको हो ।

कलैया घर भएकी ती युवती लामो समयदेखि अनियमित महिनाबारी हुने तथा महिनाबारीका समयमा अत्याधिक पेट दुख्ने समस्याबाट पिडित थिइन् । उनी ५ महिना अगाडी नै नेशनल मेडिकल कलेजमा उपचारका लागि आएपनि काठमाडौंमा समेत गएर स्वास्थ्य जाँच गराउँदा अप्रेसन गर्न सल्लाह दिइएको थियो । त्यसपछि उनी नेशनल मेडिकल कलेजमै गएर सोको उपचार गरेकी हुन् ।

‘उहाँ ५ महिना अगाडी नै आउनु भएको थियो । विचमा काठमाडौं पनि जानुभयो । नेशनल मेडिकल कलेजमै ल्याप्रोस्कोपी विधिबाट अप्रेसन हुन्छ भनेपछि उहाँ यहीँ आउनु भयो, हामीले ३ वटा प्वाल पारेर ८.८ सेमीको सिस्ट निकाल्यौं’ शल्यक्रियामा संलग्न डा.प्रविण साहले भननुभयो । अप्रेसनमा कलेजका एनेस्थेसियाका डा.असिम गौडेल, रेजिडेन्ट डा.मेलिना असप्रित तथा ओटी स्टाफ इब्राहिम अन्सारीले सहयोग गर्नुभएको थियो ।

कुनैपनि महिलाहरुमा अनियमित महिनाबारी हुन्छ र महिनाबारी हुँदा अत्याधिक पेट दुख्न भने डिम्बासयमा इण्डोमेट्रिओमाको जोखिम हुन्छ । ‘महिनाबारी हुँदा अत्याधिक पेट दुखिरहन्छ, महिनाबारी गडबड छ भने दुखाई कम गर्ने औषधीमात्र खाएर बस्नु हुँदैन । विशेषज्ञ डाक्टरलाई देखाउनु पर्छ’ उहाँले भन्नुभयो ।

अनियमित महिनाबारी हुने सय जना महिनाहरुमा १० प्रतिशतलाई इण्डोमेट्रोमाको जोखिम हुने उहाँको भनाइ छ । अत्याधुनिक उपकरणसहित दक्ष चिकित्सकहरुबाट नेशनल मेडिकल कलेजमा स्त्री तथा प्रसूति सेवा प्रवाह भइरहेको कलेजकी डाइरेक्टर नुसरत जहाँ अन्सारीले बताउनुभयो । मधेश प्रदेशकै टर्सरी स्वास्थ्य संस्थाका रुपमा रहेको नेशनल मेडिकल कलेजले सहज र सरल तरिकाले गुणस्तरीय स्वास्थ्य सेवा प्रदान गर्दै आइरहेको जनाएको छ ।