कोहलपुरः भेरी अस्पताल नेपालगन्जका प्रमुख कन्सल्टेन्ट फिजिसियन तथा सिकलसेल विज्ञ डा.राजन पाण्डे सम्मानित हुनुभएको छ । कोहलपुर नगरपालिकाले आफ्नो १० औं स्थापना दिवसको अवसरमा डा पाण्डेलाई सम्मानित गरेको हो ।

सिकलसेल एनिमिया तथा थालेसमिया रोगको पहिचान, उपचार र व्यवस्थापनमा डा.पाण्डेको भूमिका उच्च रहेको कोहलपुर नगरपालिकाले उल्लेख गरेको छ । थारु समुदायमा सिकलसेल एनिमिया र थालेसेमिया जनस्वास्थ्य समस्याका रुपमा रहँदै आएको छ ।

थारु समुदायको बाक्लो बसोबास रहेको कोहलपुरमा हालसम्म परीक्षण गरिएका मध्ये १० प्रतिशतमा सिकलसेल एनिमिया देखिएको छ । अहिलेसम्म ९५ जना सिकलसेलका रोगी फेला परेका छन् ।

सिकलसेल बाहकको संख्या एक हजार भन्दामाथि रहेको ल्याव प्रमुख शिव गौतलले जानकारी दिनुभयो ।