नेपालगन्जः सर्वोच्च अदालतले प्रमोद धिताललाई भेरी अस्पताल विकास समितिको अध्यक्षकै हैसियतमा काम गर्न बाटो खोलिदिएको छ । अध्यक्ष धितालको कार्यकाल बाँकी छदै स्वास्थ्य तथा जनसंख्या मन्त्रालयले धिताललाई हटाएर सकिल अहमद जसगढलाई अध्यक्षमा नियुक्त गरेको थियो ।
आफ्नो कार्यकाल बाँकी हुँदाहुँदै मन्त्रालयले आफुलाई हटाएर जसगढलाई अध्यक्षमा नियुक्त गरेको भन्दै धितालले सर्वोच्च अदालतमा रिट दायर गर्नु भएको थियो । सर्वोच्च अदालतका न्यायाधीश हरिप्रसाद फुयालको एकल इजलासले अल्पकालीन आदेश जारी गर्दै धिताललाई यथावत काम गर्न दिनु भनेको हो ।
धिताललाई सरकारले २०७७ साल जेठ १४ गते तीन वर्षीय कार्यकालका लागि अस्पताल विकास समितिको अध्यक्षमा नियुक्त गरेको थियो । तर कार्यकाल नसकिदै स्वास्थ्य मन्त्रालयले गएको भदौ ६ गते धिताललाई हटाएर जसगढलाई अध्यक्षमा नियुक्त गरेको थियो ।
