नेपालगन्जः कमजोर आर्थिक अवस्थाका कारण घरमै सुत्केरी भएकी एक महिलाको मृत्यु भएको छ ।
रोल्पा नगरपालिका–१० धबाङ गाउँकी करिब ३० वर्षीया महिलाको दुई साताअघि मृत्यु भएको हो । उनले घरैमा जुम्ल्याहा बच्चालाई जन्म दिएकी थिइन । एक बच्चाको पनि मृत्यु भएको छ ।
रोल्पा अस्पतालका चिकित्सक डा प्रकाशबहादुर बुढाले गर्भवतीमा उच्च रक्तचाप देखिएपछि र जुम्ल्याहा बच्चा भएकाले अप्रेसन गर्न सहज नहुने भएपछि जिल्लाबाहिर जान सुझाव दिएको बताउनुभयो ।
थप सुविधासम्पन्न अस्पतालमा जान सल्लाह दिए पनि उनी घरमा गएको पाइएको उहाँले बताउनुभयो । सुत्केरीको श्रीमान् वैदेशिक रोजगारीमा छन् । उनीँ आठ वर्षकी छोरीसहित घरमा बस्दै आएकी थिइन् ।
वडाध्यक्ष मतिलाल डाँगीले जटिल अवस्थाकी गर्भवतीको अवस्थाबारे स्वास्थ्य संस्थाले सोधखोज नगर्नु दुःखद भएको बताउनुभयो ।
