नेपालगन्जः स्वास्थ्य तथा जनसंख्या मन्त्रालयले ५ देखि ११ वर्षसम्मका बालबालिकालाई असार ९ गतेदेखि कोभिड–१९ विरुद्धको फाइजर खोप दिने भएको छ।
स्वास्थ्य तथा जनसंख्या मन्त्री विरोध खतिवडाले देशभरका विद्यालयहरुमा खोप केन्द्र तोकेर दुई चरणमा गरी ४९ लाख बालबालिकालाई खोप दिन लागेको जानकारी दिनुभयो ।
उहाँका अनुसार सुरुमा बाँकेसहित २७ वटा जिल्लामा खोप अभियान संचालन गरिने र त्यसपछि बाँकी रहेका ५० जिल्लामा खोप अभियान संचालन गरिने छ।
तोकिएको २७ जिल्लामा असार ९ गतेदेखि १५ गतेसम्म खोपको पहिलो मात्रा र दोस्रो मात्रा साउन २ देखि ८ गतेसम्ममा दिइने छ। त्यस्तै, बाँकी रहेको ५० जिल्लामा भाद्र ५ देखि ११ गतेसम्म पहिलो मात्रा र भाद्र २७ देखि असोज १ गतेसम्म दोस्रो मात्रा खोप अभियान संचालन हुनेछ।
पहिलो चरणमा बाँके, बर्दिया, दाङ, सुर्खेत, कैलाली, कञ्चनपुर र डडेलधुरासहित २७ जिल्लामा खोप लगाउने तयारी छ।
बालबालिकालाई दिइने उक्त खोप कोभ्याक्स मार्फत केही नेपाल आइसकेको छ भने केही आउने चरणमा रहेको स्वास्थ्य मन्त्रालयले जनाएको छ।
