नेपालगन्जः नेपालगन्जस्थित लाइफ लाइन जनरल हस्पिटल प्रा.लिमा डायलाइसिस सेवा सुरु भएको छ । लाइफ लाइन जनरल अस्पतालले मृगौलाका विरामीका लागि आवश्यक पर्ने डायलाइसिस सेवा सुरु गरेको अस्पतालका एमडी डा.प्रतिक श्रेष्ठले जानकारी दिनुभयो ।
निजी अस्पतालबाट डायलाइसिस सेवा दिने लाइफ लाइन यसक्षेत्रकै पहिलो हस्पिटल भएको एमडी डा.श्रेष्ठको दावी छ । बाँकेमा नेपालगन्जस्थित भेरी अस्पताल र कोहलपुरस्थित मेडिकल कलेजमा डायलाइसिस सेवा भएपनि विरामीको चाप अत्यधिक हुने गरेका कारण इमरजेन्सीका बिरामीले सास्ती खेप्नु परेको थियो ।
कोहलपुर मेडिकल कलेजमा रहेको डायलाइसिस सेवा संस्थाले चलाउँदै आएको छ । कर्णाली र सुदूरपश्चिम डायलाइसिस सेवा नहुँदा मृर्गालाका विरामीहरु बाँकेमै आउने गरेका छन् । जस्का कारण भेरी अस्पतालमा विरामीको चाप बढ्ने गरेको छ ।
विरामीले पालो नपाउँदा काठमाडौं र भारतको लखनउ जानु पर्ने बाध्यता छ । लाइफ लाइन हस्पिटलमा डायलाइसिस सेवा सुरु भएपछि अब भने बिरामीहरुलाई अन्यन्त्र जानु पर्ने बाध्यता नरहेको भेरी अस्पतालका डायलाइसिस विभाग प्रमुख डा पारश श्रेष्ठले जानकारी दिनुभयो ।
हस्पिटलमा अहिले दुई वटा मेसिन राखिएको छ । मेसिनहरु थप गर्ने तयारीमा हस्पिटल छ । यो सेवा चौविसै घण्टा हुने भएकाले आपत्तकालिन विरामीले ठूलो लाभ पाउने भएका छन् ।
