नेपालगन्जः कर्णाली करिडोर निर्माणमा खटिएका नेपाली सेना र सर्वसाधारणलाई कार्यस्थलमै कोरोना भाइरसविरुद्धको बुस्टर मात्रा खोप लगाइएको छ।
कोरिडोरको सुनाखाडा खण्डमा सडक निर्माणमा खटिएका सेना र सर्वसाधारणलाई खार्पुनाथ गाउँपालिकाले बुस्टर खोप लगाएको हो।
खार्पुनाथ गाउँपालिकाका स्वास्थ्य संयोजक बलिराज शाहीले कर्णाली करिडोरअन्तर्गत हुम्ला खण्डको दुल्लीकुनादेखि लालीबगर क्षेत्रमा सडक निर्माणमा खटिएका नेपाली सेना र सर्वसाधारणलाई बुस्टर मात्रा लगाइएको जानकारी दिनुभयो ।
सेना र सर्वसाधारण कामदारले बुस्टर मात्रा नलगाएको जानकारी आएपछि तत्काल निर्माणस्थलमा स्वास्थ्यकर्मी परिचालन गरेर खोप लगाइएको उहाँले बताउनुभयो।
हाल सडक निर्माणस्थलमा नेपाली सेना र सर्वसाधारणको चार समूह गरी ३५ जनाले काम गर्दै आएका छन्। २१ जना नेपाली सेना र १० जना सर्वसाधारण कामदारलाई बुस्टर मात्रा लगाइएको छ।
