नेपालगन्ज: दैलेखमा निस्सासिएर दुई जनाको मृत्यु भएको छ। ठाँटीकाँध गाउँपालिका–१ पिपलचोकका हरिकला बादी र उहाँका छोरा रमेश वादी घरभित्र मृत फेला पर्नु भएको हो ।

बिहीबार राति भान्सा कोठामा सुतिरहेका उनीहरू शुक्रबार बिहान मृत फेला परेको जिल्ला प्रहरी कार्यालय दैलेखले जनाएको छ।

‘खरले छाएको घरभित्र भान्सामा चुलोदेखि करिब डेढ फिट नजिक सुतेका रहेछन्, उनीहरूले ओछ्याएको गुन्द्री र सिरक चुलोतिर पुगेर आगो सल्केको पनि पाइयो,’ दैलेखका प्रहरी प्रमुख प्रहरी नायब उपरीक्षक भुवनेश्वरप्रसाद साहले भन्नुभयो ‘उनीहरूको शरीरको केही भाग पोलिएको पनि छ।’

उहाँका अनुसार ४० वर्षीया हरिकलाको शरीरको पछाडिको भाग जलेको छ भने १८ वर्षीय रमेशको हात जलेको छ।

‘पोलिएर भन्दा पनि धुवाँ धेरै भएर निस्सासिएर मृत्यु भएको जस्तो देखिन्छ,’ डिएसपी साहले भन्नुभएको छ ।