नेपालगन्ज: बाँकेका तीनवटा प्रयोगशालामा गरिएको परीक्षणमा थप १०५ जनामा कोभिड पुष्टि भएको छ । कुल ३३६ नमुना परीक्षण गर्दा उनिहरुमा संक्रमण पुष्टि भएको जिल्ला कोभिड व्यवस्थापन समितिले जनाएको छ ।
शनिबार भेरी अस्पतालको प्रयोगशालामा १७८ नमुना परीक्षण गर्दा ७३ जना, मेडिकल कलेज कोहलपुरको प्रयोगशालामा १०२ नमुना परीक्षण गर्दा १० जना र बागेश्वरी ल्याबमा ५६ नमुना परीक्षण गर्दा २२ जना गरि कुल १०५ संक्रमित थपिएका हुन् ।
संक्रमण पुष्टि हुनेहरुमध्य बाँकेका ४३ जना छन् । जिल्लाका १७ जना महिला र २६ जना पुरुष गरि ४३ जनामा संक्रमण पुष्टि भएको हो । हालसम्म बाँकेमा ८० हजार २४७ जनाको पीसीआर परीक्षण गरिएको छ ।
आज जिल्लामा कोरोना संक्रमण मुक्त भई ७९ जना डिस्चार्ज भएका छन् । ४० जना महिला र ३९ जना पुरुष आज एकैदिन निको भएको जिल्लाका कोरोना फोकलपर्सन तेज ओलीले जानकारी दिनुभयो ।
कोरोना भाइरस संक्रमणकै कारण गएको २४ घण्टामा थप ७ जनाको मृत्यु भएको छ । जिल्लाका तीनजना र जिल्ला बाहिरका ४ जना गरि थप ७ जनाको संक्रमणका कारण मृत्यु भएको हो ।
