काठमाडौं: कोरोना संक्रमण रोकथाम तथा नियन्त्रणका लागि प्रभावकारी ढंगले काम गर्न कोभिड–१९ व्यवस्थापन केन्द्रलाई प्रधानमन्त्री केपी शर्मा ओलीले निर्देशन दिनुभएको छ।

नेपाल सरकारको सिफारिसमा राष्ट्रपतिबाट जेठ ६ गते जारी भएको अध्यादेशअनुसार प्रधानमन्त्री अध्यक्ष रहनुभएको कोभिड–१९ निर्देशक समितिको आज मङ्गलवार बसेको पहिलो बैठकमा प्रधानमन्त्री ओलीले कोभिड-१९ संक्रमण नियन्त्रणका लागि तत्काल सबै नागरिकलाई खोपको सुनिश्चितता गर्ने गरि काम गर्न निर्देशन दिनुभएको हो ।

उहाँले कोभिड १९ नियन्त्रणसम्बन्धी र सार्वजनिक खरिद ऐनसम्बन्धी अध्यादेशले सम्पूर्ण प्रक्रियागत जटिलताहरूको समाधान गरेको भन्दै कोभिड- १९ व्यवस्थापन केन्द्रलाई तदारुकताका साथ कामअघि बढाउन निर्देशन दिएको प्रधानमन्त्री तथा मन्त्रिपरिषद्को कार्यालयका सचिव खगराज बरालले जानकारी दिनुभयो ।

आवश्यक ऐन नियम नभएका कारण समस्या भए पनि अब सबै समस्याको सम्बोधन भएकोले ढिला गर्ने छुट नभएको भन्दै प्रधानमन्त्रीले एक्सनमा जान कोभिड-१९ व्यवस्थापन केन्द्रलाई निर्देशन दिनुभएको हो ।

समितिको पहिलो बैठकमा कोभिड–१९ व्यवस्थापन केन्द्रका पदाधिकारी उपस्थिति थियो ।