काठमाडौं: कोभिड संक्रमित संख्या दिन प्रतिदिन बढिरहेको नेपालमा संक्रमण मुक्त हुनेहरुको संख्या पनि बढिरहेको छ । संक्रमण मुक्त भएर सोमबार ४ हजार बढी डिस्चार्ज भएका छन् ।

सोमबार देशका विभिन्न संस्थागत र होम आइसोलेसनमा स्वास्थ्य लाभ गरिरहेका ४ हजार ७ जना निको भएको स्वास्थ्य तथा जनसंख्या मन्त्रालयको तथ्यांकमा उल्लेख छ ।

हालसम्म नेपालमा कोरोना संक्रमण मुक्त भएर डिस्चार्ज हुनेहरुको कुल संख्या ३ लाख ६ हजार ७९४ पुगेको छ। निको हुने दर करिब ७६ प्रतिशत छ ।

यसैबचि गएको २४ घण्टामा नेपालमा थप ९ हजार २७१ जनामा कोरोना भाइरस संक्रमण पुष्टि भएको छ । अहिले करिब ९३ हजार बढी कोभिडका सक्रिय संक्रमित स्वास्थ्य लाभ गरिरहेका छन् ।