नेपालगन्ज ३१, साउन ।
कोरोना भाइरसको संक्रमण समुदायस्तरमै फैलिन थालेपछि बाँकेको कोहलपुर नगरपालिकाले आइतवारदेखि कार्यालय बन्द गर्ने भएको छ । कोहलपुर नगरपालिकाका प्रमुख लुटबहादुर रावतको अध्यक्षतामा शनिवार बसेको बैठकले भोली आइतवार गतेदेखि लागु हुने गरी भदौ पाँच गतेसम्म नगरपालिकाको कार्यालयसँगै वडा कार्यालय बन्द गर्ने निर्णय गरेको हो । बैठकले सरकारी तथा गैर सरकारी कार्यालय र उद्योग व्यवसाय समेत बन्द गर्ने निर्णय गरेको छ ।
बैठकपछि जारी सूचनामा भनिएको छ–‘कोरोना भाइरसको जोखिम बढेकाले नगरपालिका क्षेत्रमा रहेका सरकारी तथा गैरसरकारी कार्यालय, बैंक तथा वित्तीय संघसंस्था, होटल, रेष्टुरेन्ट व्यापार, व्यवसाय, उद्योग कलकारखाना, तरकारी हाटबजारलगायतका सबै सेवा पूर्णरुपमा बन्द गरिएको छ ।’
बाँकेमा पछिल्लो समय दैनिकरुपमा कोरोना भाइरसका संक्रमिथ थपिरहेका छन् । स्थानीय प्रशासनले निषेधाज्ञा हटेपनि भाइरसको जोखिम कायमै रहेकाले सजगता अपनाउन अपिल गर्दै आएको छ ।
