नेपालगन्जः नेपालगन्जको गणेशमान चोकस्थित सिद्धार्थ अस्पतालमा शनिवार आयोजना गरिएको दुई फरक विषयसँग सम्बन्धित विशेषज्ञ स्वास्थ्य शिविरमा ८३ जनाले सेवा लिएका छन् ।
अस्पतालले विशेषज्ञ चिकित्सकमार्फत् आयोजना गरेको निःशूल्क स्वास्थ्य शिविरमा ८३ जनाले सेवा लिएका छन् । ४५ जनाले अर्थोपेडिक र ३८ जनाले फिजिसियन सेवाको लाभ लिएको अर्थोपेडिक्स सर्जन डा.लक्ष्मण सिग्देलले जानकारी दिनुभयो ।
हाडजोर्नी तथा नशा रोग र छाती, मुटु, मधुमेह र उच्च रक्तचापलगायत रोगको निःशूल्क जाँच तथा परामर्श सेवा प्रदान गरिएको उहाँको भनाइ छ । हाडजोर्नी तथा नशा रोग सम्वन्धित सेवा अर्थोपेडिक्स सर्जन डा.सिग्देल र फिजिसियन सेवा डा. विपिन आचार्यले प्रदान गर्नु भएको हो ।
अस्पतालले सामाजिक उत्तरदायित्व अन्तर्गत् निःशूल्क विशेषज्ञ स्वास्थ्य शिविर आयोजना गरिएको जनाएको छ । साताको शनिवार स्वास्थ्य सेवाको महत्व आम नागरिकलाई बुझाउनेगरी अन्य रोगका विशेषज्ञ चिकित्सकहरुबाट पनि यस्तै खाले शिविर आयोजना गरिने डा सिग्देलले जानकारी दिनुभयो ।