नेपालगन्ज: कोरोना भाइरस संक्रमणका कारण बाँकेका अस्पतालमा थप ६ जनाको मृत्यु भएको छ ।
संक्रमित बिरामीहरुको उपचार भैरहेको नेपालगन्ज स्थित भेरी अस्पतालमा चारजना र नेपाललगन्ज मेडिकल कलेज शिक्षण अस्पताल कोहलपुरमा दुईजना गरि थप ६ जनाको मृत्यु जिल्लाका कोभिड फोकलपर्सन तेज ओलीले जानकारी दिनुभयो ।
मृत्यु हुनेहरुमा तुलसीपुर उपमहानगरपालिका-१२ दाङका ४० वर्षीया महिला, बासगढी नगरपालिका-३ बर्दियाका ६५ वर्षीय पुरुष, बढैयाताल गाउँपालिका-६ बर्दियाका ६० वर्षीया महिला, घोराही उपमहानगरपालिका-१८ दाङका ५१ वर्षीय पुरुष हुनुहुन्छ ।
त्यस्तै उपचारका क्रममा भेरी अस्पतालमा कोहलपुर नगरपालिका-१० का ७१ वर्षीय पुरुष र खजुरा गाउँपालिका-४ बाँकेका ३२ वर्षीया महिलाको समेत मृत्यु भएको अस्पतालले पुष्टि गरेको छ ।
योसँगै कोरोना भाइरस संक्रमणका कारण हालसम्म बाँकेमा उपचारका लागि जिल्ला बाहिरबाट आएका २५१ जना र जिल्लाकै २७९ जनाको मृत्यु भएको छ ।
